ʻO le Punaʻoa a Siaosi Palauni i Minpaku
ʻO se faʻamatalaga ʻāmata e uiga i le soifua faʻapea ma gāluega a Siaosi Palauni, faʻatasi ai ma ana punaʻoa o meataulima o tū ma aga.
ʻO Le Punaʻoa a Siaosi Palauni i Minpaku
ʻO punaʻoa ʻuma a Siaosi Palauni, e aofia ai kopi o ata ma ata lolomi, faʻamaumauga, tusitusiga tau tū ma aga, ma itūʻāiga taʻitasi o le talaʻaga o meaola, ma ʻua salalau solo lo latou teuina i falemataʻaga faʻapēnā ma punaʻoa a ni tagata taʻitoʻatasi i atunuʻu ʻeseʻese. E leʻi faia i ai ni sāʻiliʻiliga ʻatoʻatoa i nei punaʻoa. ʻOloʻo iai foʻi nisi nofoaga e maua ai punaʻoa a Siaosi Palauni e pei o le Mitchell Library, i Sini (e maua ai faʻamaumauga ma kopi o ata), ma le Falemataʻaga o Ausetālia, Sini (kopi o ata) (vaʻai ʻIsi Alagāʻoaʻ).
E tusa ma le 3000 (toluafe) mea ʻeseʻese oʻoloʻo maua i le Punaʻoa a Siaosi Palauni i Minpaku. ʻO le tele o nei meataulima na gaosia mai i mea faʻalenātura. Na aoaoina mai nei mea i atumotu o le Pasefika i ni tausaga pe tusa ma le fāsefulu e ʻāmata mai le vaitaimi o le 1860. E ui ina e lē tele ni faʻamaumauga ma auʻiliʻiliga e patino i nei uluaʻi punaʻoa, ʻo nei meataulima ʻua ʻavea ma faʻasinoala i se vaitaimi na saosaoa ai suiga o le soifuaga i le lalolagi o Oseania. ʻUa ʻavea foʻi ma faʻamaumauga ʻua iloa ai le ʻeseʻesega o le itūʻāiga ōlaga o nā vaitau ma nei onapō.
E maua le tele o nei meataulima i le punaʻoa peʻā saʻili le komepiuta i le ututeumea mo tagata lautele.
E ui ina sā ofoina atu e Palauni le punaʻoa e faʻatau e le Falemataʻaga o ʻAusetālia, i le ʻāmataga o le 1900, ʻae na iʻu ina faʻatau e le Iunivesitē o Tyne i ʻEgelani, ma teumau ai iʻinā e fai ma punaʻoa e fai ai sāʻiliʻiliga ma aʻoaʻoga seʻia oʻo ina faʻatauina e le Falemataʻaga o Mea Tau Tū ma Aga a Iapani i le 1986. E tele ni fefinauaʻiga na māfua mai talu le faʻatauga faʻalua lea o le punaʻoa, ma e aliali mai lenei faiga i ni lōmiga ʻoloʻo lisiina atu i lalo o le vaega ʻIsi Alagāʻoaʻ. ʻO nisi faʻamatalaga faʻaopoopo na tūsia i le taimi na uluaʻi faʻailoa ai faʻalauaʻitele le punaʻoa, i se Faʻaaliga Faʻapitoa na faia i Minpaku i Osaka, i le 1999.
Lōmiga i le gagana ʻIgilisi e uiga i le punaʻoa i Minpaku.
- E Uiga i le Punaʻoa a Siaosi Palauni: Shuzo Ishimori
- Fefinauaʻiga i le Punaʻoa,ʻO le Faʻaaliga o Punaʻoa a Siaosi Palauni, Mati 10 – Me 31 1999:
- Helen Gardner
- Measina o Tū ma Aga mai le Pasefika, ʻO le Faʻaaliga o Punaʻoa a Siaosi Palauni, Mati 10 – Me 31 1999:
- Kate Vusoniwailala